དག་སྣང་ལས༔
ཚོགས་བསགས་དངོས་གྲུབ་ཆར་འབེབས་བཞུགས་སོ༔

ཕཊ༔
གཟུང་འཛིན་འཁྲུལ་པའི་རྣམ་རྟོག་རང་ངོར་སངས༔
རྒྱུ་ཉིད་དབང་བསྡུས་རྐྱེན་སྣང་ཟིལ་གྱིས་གནོན༔
ཕཊ༔
སྐྱབས་གནས་དམ་པ་རྣམས་ལ་སྐྱབས་སུ་མཆི༔
འགྲོ་ཀུན་རྣམ་མཁྱེན་ཕྱིར་དུ་གོ་འཕང་བསྒྲུབ༔
ཕཊ༔
རང་རིག་ཀ་དག་རྡོ་རྗེ་རྣལ་འབྱོར་མ༔
སྤྱི་བོར་ཡར་ཐོན་འཁོར་འདས་ཁྱབ་བདག་མོ༔
ཕཊ༔
ཕྱག་གཡས་གྲི་གུག་རང་ལུས་ཐོད་པ་བྲེག༔
སྟོང་གསུམ་ཙམ་གྱི་མི་མགོའི་སྒྱེད་པུར་བཞག༔
དེ་ནང་བམ་ཆེན་བདུད་རྩིའི་རྒྱ་མཚོར་གྱུར༔
སྣང་སྲིད་འཁོར་བཅས་མ་ལུས་ཐམས་ཅད་དུ༔
མཆོད་སྤྲིན་རྒྱ་མཚོ་རྒྱུན་མི་འཆད་པར་སྤྲོས༔
ཨོཾ་ཨཱཿ་ཧཱུྃ༔

ལན་གསུམ༔

ཕཊ་ཕཊ་ཕཊ༔
སྐྱབས་གནས་དཀུན་མཆོག་རྩ་གསུམ་རྒྱ་མཚོ་མཆོད༔
སྐུ་གསུམ་བརྒྱུད་གསུམ་རིག་འཛིན་ཚོགས་རྣམས་མཆོད༔
ཡེ་ཤེས་དབྱིངས་ཀྱི་དམ་ཅན་རྒྱ་མཚོ་མཆོད༔
ཚོགས་རྫོགས་སྒྲིབ་དག་དོན་གཉིས་ལྷུན་གྲུབ་སྩོལ༔
ཕཊ་ཕཊ་ཕཊ༔
རིགས་དྲུག་ཕ་མ་ལན་ཆགས་བགེགས་རིགས་སོགས༔
མཆོད་སྦྱིན་ཡུལ་གྱུར་ཀུན་ལ་མཉེས་མཆོད་འབུལ༔
བུ་ལོན་ལན་ཆགས་མ་ལུས་བྱང་ནས་ཀྱང༔
ཐམས་ཅད་མངོན་རྫོགས་སངས་རྒྱས་ཐོབ་པར་ཤོག༔
ཕཊ་ཕཊ་ཕཊ༔
དགེ་བའི་རྩ་བ་འགྲོ་དྲུག་ཡོངས་ལ་བསྔོ༔
མ་ལུས་ཚོམ་བུ་གཅིག་ཏུ་སངས་རྒྱས་ཤོག༔
རང་སེམས་མཆོད་སྦྱིན་དངོས་ཡུལ་དབྱེར་མེད་དུ༔
ཡུམ་ཆེན་ཆོས་སྐུའི་ཀློང་དུ་རོ་གཅིག་ངང༔
ཨ་ཨ་ཨ༔ ཕཊ་ཕཊ་ཕཊ༔

ས་མ་ཡ༔ རྒྱ་རྒྱ་རྒྱ༔་ གུ་ཧྱ༔

(手写脚本)

འདི་ལས་བྱིན་རླབས་མྱུར་བ་མེད༔
ཕྱི་ནང་གསང་བའི་བར་ཆད་སེལ༔
ཡུམ་ཆེན་དགོངས་ཀློང་ཡངས་པ་རུ༔
མཐར་ཐུག་གྲོལ་འགྱུར་ཐེ་ཚོམ་མེད༔
འདི་ཉིད་ཉམས་སུ་ལོངས་ཤེག་བུ༔
པདྨ་སྙིང་ཐིག་གཏད་དོ་རྒྱ༔
བརྡ་ཐིམ༔
ཞེས་པ་འདི་ཡང་ཤིང་མོ་གླང་གི་ལོ་ཧོར་ཟླ་གསུམ་པའི་ཚོས་བཅུའི་ནུབ་མོ་ཨོ་རྒྱན་མཚོ་སྐྱེས་རྡོ་རྗེས་སྤྲང་མ་ནུས་བདུད་འཇོམས་རྡོ་རྗེ་ལ་ཁྱོད་ཀྱི་སློབ་བུ་གཉིས་ཀྱི་ཆོས་སྐལ་ཡིན་ཆེས་གནང་ནས་གཏད་རྒྱའོ།་་ །དགེའོ།། །།